पुणे : दलीतवस्ती सुधार योजनेंतर्गत नगरपालिकांना निधी उपलब्ध करुन देण्यात येतो. या निधीतून विविध विकास कामे हाती घेण्यात येतात. या निधीतून करण्यात येणारी विकास कामे तातडीने पूर्ण करण्यात यावी, अशी सूचना अन्न व नागरी पुरवठा मंत्री तथा पालकमंत्री गिरीश बापट यांनी केली.दलीतवस्ती सुधार योजनेच्या निधीतून समाज मंदिर बांधकाम, अभ्यासिका, दिवाबत्ती कामे, बचत गटासाठी कार्यालय बांधणे, रस्ता डांबरीकरण, रस्त्याचे काँक्रीटीकरण करणे, व्यायामशाळा बांधणे, शौचालयाचे बांधकाम, गटार बांधकाम, सफाई कामगारांसाठी निवास बांधकामाची कामे करण्यात येतात. या निधीतून झालेला खर्च, कामांची सद्यस्थिती तसेच कामे पूर्ण होण्यासाठी लागणारा कालावधी यासंदर्भात व्हिव्हीआयपी विश्रामगृहात झालेल्या बैठकीत पालकमंत्री गिरीश बापट यांनी आढावा घेतला त्यावेळी ते बोलत होते. नगरपालिका प्रशासनाने या योजनेचा निधी विहीत मुदतीत खर्च करावा अशी सूचनाही, त्यांनी यावेळी केली.या बैठकीला जिल्हाधिकारी सौरभ राव, निवासी उपजिल्हाधिकारी राजेंद्र मुठे, जिल्हयातील नगर पालिकांचे मुख्याधिकारी उपस्थित होते.