पुणे दि.22: जागतिक महिला दिनानिमित्त महिलांच्या आरोग्य तपासणी शिबिराचे आयोजन विधान भवन सभागृहात करण्यात आले होते. या शिबिराचे उदघाटन विभागीय आयुक्त एस. चोक्कलिंगम यांच्या हस्ते झाले.
अधिकाधिक महिला कर्मचार्यांनी शिबिराचा लाभ घ्यावा व आपल्या आरोग्याबाबत जागरूक रहावे असे आवाहन विभागीय आयुक्त चोक्कलिंगम यांनी यावेळी केले.
या शिबिरात विभागीय कार्यालय व जिल्हाधिकारी कार्यालयातील सर्व महिला कर्मचाऱ्यांची तपासणी जहागीर हॉस्पिटल यांच्या सौजन्याने 22 ते 30 मार्च 2017 दरम्यान करण्यात येणार आहे. यासाठी महिला कर्मचाऱ्यांना त्यांच्या सोईनुसार वेळ देण्यात येणार आहे अशी माहिती जिल्हाधिकारी सौरभ राव यांनी यावेळी दिली.
आजच्या धकाधकीच्या आयुष्यात कॅन्सरसारख्या दुर्धर आजारांचे प्रमाण बळावत चालले आहे. या आजाराचे वेळीच निदान झाले तर,त्यावर आपण सहज मात करू शकतो,त्यासाठी आवश्यक ते सर्व उपचार उपलब्ध आहेत असे प्रतिपादन जहांगीर हॉस्पिटलचे संचालक सरकवासजी जहांगीर यांनी केले.
या कार्यक्रमास ,सामान्य प्रशासन उप आयुक्त कविता द्विवेदी, पुरवठा उप आयुक्त निलिमा धायगुडे,निवासी उपजिल्हाधिकारी राजेंद्र मुठे,उपजिल्हाधिकारी मोनिका सिंग तसेच जिल्हाधिकारी कार्यालयातील सर्व महिला व कर्मचारी उपस्थित होते.