पुणे-महापालिका अतिरिक्त आयुक्त राजेंद्र निंबाळकर यांना मारहाण केल्याच्या प्रकरणात नगरसेवक रवींद्र धंगेकरसह तिघांना शुक्रवारी कोर्टाने एक दिवसाची पोलिस कोठडी सुनावली. अतिरिक्त मुख्यन्यायदंडाधिकारी पी. डी. सावंत यांच्या कोर्टाने हा आदेश दिला.
धंगेकर यांचा अटकपूर्व जामीन सत्र न्यायालयाने फेटाळल्यानंतर त्यांच्यासह तिघेजण पोलिसांसमोर हजर झाले. त्यांना कोर्टात हजर करण्यात आले होते. धंगेकर यांच्यासह मंदार हेमंत पुरोहित (वय २४), अमित मोहन देवकर (३८, दोघेही रा. कसबा पेठ) या तिघांना पोलिस कोठडी सुनावण्यात आली. पाषाण आणि कात्रज येथील तलावांमध्ये जलपर्णी नसतानाही २३ कोटी रुपयांच्या निविदा काढण्यात आल्याची टीका करून काँग्रेस आणि राष्ट्रवादी काँग्रेसच्या नगरसेवकांनी महापौरांच्या दालनात आंदोलन केले होते. महापालिका अतिरिक्त आयुक्त राजेंद्र निंबाळकर यांना धक्काबुक्की होऊन त्यांच्या अंगावर चप्पल भिरकविण्यात आली होती. सरकारी कामात अडथळा आणल्याने गुन्हा दाखल करण्यात आला आहे.
अटक करण्यात आलेल्या तिघांना कोर्टात हजर करण्यात आले. आरोपींनी ही निविदा भरली होती का, गुन्ह्याचा सूत्रधार कोण आहे, याचा तपास करण्यासाठी त्यांना पोलिस कोठडी देण्याची मागणी सरकारी वकील हेमंत मेंडकी यांनी केली. आरोपींचे वकील अॅड. विजयसिंह ठोंबरे, अॅड. विपुल दुशिंग, अॅड. मनिष पाडेकर यांनी पोलिस कोठडीला विरोध केला. धंगेकर गेली २० वर्षे नगरसेवक आहेत. भ्रष्टाचार उघडकीस आणला म्हणून खोटी तक्रार करून धंगेकर यांना अडकविण्यात आले आहे, असा युक्तिवाद या वेळी करण्यात आला.