पुणे, : देशातील व्यापाऱ्यांसमोर अनेक प्रश्न आहेत. व्यापाराचे आरोग्य बिघडले असून याप्रश्नी देशभरातील व्यापारी संघटीत झाला तर, सरकारला व्यापाऱ्यांची दखल घ्यावीच लागेल, असे प्रतिपादन लक्ष कॉन्फिडरेशन ऑफ ऑल इंडिया ट्रे़डचे (कैट) अध्यक्ष बी सी भारतीय यांनी आज येथे केले.
व्यापारी दिनाच्या निमित्ताने पुणे जिल्हा रिटेल व्यापारी संघाच्या वतीने सन्मान समारंभाचे आयोजन करण्यात आले होते. अण्णाभाऊ साठे सभागृह येथे झालेल्या या कार्यक्रमास गुन्हे अन्वेषण विभागाचे आयुक्त अशोक मोराळे, आमदार माधुरी मिसळ, मालपाणी उद्योग समूहाचे गिरीश मालपाणी, बिझनेस स्टॅण्डर्डचे उपाध्यक्ष विजय कडू, ग्राहक पेठचे सूर्यकांत पाठक, नगरसेवक प्रवीण चोरबोले, नगरसेविका माधुरी सहस्त्रबुद्धे, धैर्यशील पाटील, बाळासाहेब धोका, सूर्य इलेक्ट्रॉनिकचे रमेश चौधरी, हरीश परदेशी आदी मान्यवर उपस्थित होते. व्यापारी दिनानिमित्त चितळे उद्योग समूह, खत्री पॉट आइस्क्रीम, गोल्डन बेकरी, केदार असोसिएट्स, मॅजिक स्ट्रक्चर -मोरे, शिवशक्ती ग्रुप, साक्षी ग्रुप यांना उत्कृष्ठ व्यापारी पुरस्काराने गौरविण्यात आले.
व्यापाऱ्यांनी कायद्याचे पालन करीत व्यापार करावा आणि येणाऱ्या स्पर्धेच्या काळात संघटीत व्हावे. संघटीत झालो तरच, व्यापार वाचेल, असेही भारतीय म्हणाले.
पुणे जिल्ह्यात रिटेल व्यापाऱ्यांना संघटीत करण्याचे काम आम्ही करीत असून फक्त प्रश्न मांडण्या पुरते नाही तर, व्यापाऱ्यांना सर्वार्थाने सक्षम करण्यासाठी संघटना काम करीत असल्याचे सचिन निवंगुणे यांनी सांगितले. यावेळी उत्कृष्ठ क्रियाशील संघटना म्हणून बिबवेवाडी रिटेल व्यापारी संघटनेचा गौरव करण्यात आला. त्याचबरोबर स्वतःचा व्यवसाय सांभाळत संघटनेसाठी काम करणाऱ्या ८० व्यापाऱ्यांना मान्यवरांच्या हस्ते सन्मानित करण्यात आले. लकी ड्रॉमधील सात विजेत्यांना बक्षीस देण्यात आले. सारंग राडकर यांनी आभार मानले.