कर्वे समाजकार्य महाविद्यालयामध्ये जागतिक अल्झायमर्स दिवस साजरा
पुणे- विसरभोळेपणा दिवसेंदिवस वाढतच जाणार्या अल्झायमर्स च्या रुग्णांमध्ये त्यांच्या दिनचर्येच्या गोष्टीदेखील विस्कळीत होत असल्यामुळे अशा परिस्थितीमध्ये प्राथमिक स्वरूपामध्ये काळजी घेण्याची मोठी जबाबदारी ही रुग्णाच्या सतत जवळ व संपर्कात असणार्या कुटुंबीयांवर असून या अवस्थेमध्ये कुटुंबियांनी अल्झायमर्स रुग्णांच्या दिनचर्येचे नियोजन करण्याची गरज असल्याचे मत महाराष्ट्र राज्य मानसिक आरोग्य जनजागृती समितीचे सचिव प्रा. चेतन दिवाण यांनी व्यक्त केले.
जागतिक अल्झायमर्स दिवसाचे औचित्य साधून कर्वे सामाजकार्य महाविद्यालयाच्या वैद्यकीय आणि मनोवैज्ञानिक सामाजिक कार्य विभागाच्या वतीने आयोजित चर्चासत्रामध्ये प्रा. दिवाण बोलत होते. महाविद्यालयाचे संचालक डॉ दीपक वलोकर यांच्या मार्गदर्शनाखाली पार पडलेल्या या चर्चासत्रामध्ये प्रा. दादा दडस यांची प्रमुख उपस्थिती होती. यावेळी वैद्यकीय आणि मनोवैज्ञानिक सामाजिक कार्य विभागाच्या विद्यार्थ्यांनी चर्चेमध्ये सहभाग घेऊन अल्झायमर्स म्हणजे काय तसेच अल्झायमर्स ची कारणे व उपाययोजना यावर चर्चा केली तसेच अल्झायमर्स संदर्भात विविध ठिकाणी प्रसिद्ध झालेल्या माहिती बद्दल देखील सदर्भासाहित चर्चा करण्यात आली. चर्चासत्रामध्ये संदीप मोटे, मदन पथवे, श्रद्धा पवार, योगिता मेंगाल, मोहिनी अग्निहोत्री, प्रसनजीत साखरे, पूजा मडके, सुजाता दडस, रश्मी साळवे, आशंका नखाते, नम्रता पेंढारकर आदी विद्यार्थ्यांनी सहभाग घेतला.