पालकांचा क्रीडा दिन उत्साहात
पुणे : येथील माधव सदाशिव गोळवलकर विद्यालयात पालकांचा क्रीडा दिन नुकताच उत्साहात साजरा झाला. या अभिनव उपक्रमाची कल्पना मुख्याध्यापिका कल्पना धालेवाडीकर यांची होती. पालक-शिक्षक संघाचा त्याला उत्स्फूर्त प्रतिसाद मिळाला. १७४ पालकांनी यामध्ये सहभाग घेतला. पालक-शिक्षक संघाचे उपाध्यक्ष प्रशांत कुलकर्णी यांनी त्याचे नियोजन केले.
या क्रीडादिनाचे उद्घाटन आजी-आजोबांच्या हस्ते फुगे उडवून व क्रीडाज्योत प्रज्ज्वलित करून झाले. पालकांच्या वेगवेगळ्या स्पर्धा घेण्यात आल्या. मेमरी गेम, डार्ट बोर्ड गेम, बकेट बॉल, रिले शर्यत आणि या स्पर्धेचे प्रमुख आकर्षण होते संगीत खुर्ची स्पर्धा. स्पर्धेच्या बक्षीस वितरण सोहळ््यात झुम्बा, सूर्यनमस्कार, योगासने, मंगळागौरीचे खेळ, लेझीम आादी प्रात्यक्षिके झाली. पालक संघाने सादर केलेल्या समूहगीताला विशेष दाद मिळाली. राष्ट्रकुल स्पर्धांत सुवर्णपदक विजेत्या ज्यूदोपटू आणि प्रशिक्षक रचना धोपेश्वर प्रमुख पाहुण्या म्हणून उपस्थित होत्या.
मुख्याध्यापिका धालेवाडीकर यांनी प्रास्ताविक केले. धोपेश्वर यांनी आॅलिम्पिकसाठी तयारी करण्याच्या दृष्टीने विद्यार्थ्यांतून खेळाडू घडविण्यासाठी कष्ट घेण्याची तयारी असल्याचे सांगितले. नियमित व्यायामाद्वारे सुदृढ राहण्याचाही संदेश त्यांनी पालकांना दिला. तृप्ती साठे, स्नेहा देशपांडे यांनी सूत्रसंचालन केले. प्रशांत कुलकर्णी यांनी आभार मानले. शाळा समितीचे अध्यक्ष मिलिंद कांबळे, माजी अध्यक्ष डॉ. सुनील भडंगे, डॉ. जगदीश लांजेकर, पर्यवेक्षक विकास दिग्रसकर उपस्थित होते.